دموع دموع ... دموع مغرقانى
شموع انطفت ... وضلمه متوهانى
وزمان قاسى ... وأيامه ظلمانى
وكان مالى ومال الاّنين
وليه جرحى يكون جرحين
جرح أب غاب ... وجرح حبيبه ضاعت
وأمل بنيته فى سراب ... وأحلام بنيتها وراحت
سبتنى ليه يابا ... أسهر بدمع العين
تايه فى دنيا غابه ... ومش عارف اروح لمين
بغنى على الربابه ... وبحكى موالى الحزين
أمى نادت عليك ... وانت يابا لبيت
وخدت معاك بأيديك ... احلام ياما فيها بنيت
يابا رحت فين قل لى ... وسايبنى لعذابى وذلى
أزاى عليك نهون ... انا عارف مش بأيديك
ده كاس وعلينا حايكون ... ضيعت أحلام بنيتها عليك
ياأبو قلب طيب حنون ... والله يابا حاصون
أمانه سبتها فى ايديا ... مهما أشوف ويكون
أمانتك يابا حانصونها
وعمرى أبدا ماخونها
حاشتريها بكل غالى ... ماانا واخد على المحن
وابدا مش حابيعها ... مهما كان الثمن
ومش حاطلب من زمانى ... أى أمانى تانى
واحلامى حانساها
وحانسى عمرى معاها
بس ليا سؤال يازمانى ...حأسأله وبأمانه جاوبنى
ليه تستكتر عليا الأمانى ... وليه يازمانى تاخدها منى
عارف انه نصيب على الجبين مكتوب ... ومش بأيدى أمسحه
قدر وعلى أمره أنا مغلوب ... أتعب عشان غيرى أريحه
وحاصبر وأنا راضى
ومادد لك الايادى
بكل تقوى وخشوع
وعيون ماليها الدموع
لك وحدك ياالهى
ياعزوتى و كل جاهى
صابر مع الصابرين
وبضحك وقلبى حزين
تعليق