سهرة شباب:


جرت العادات والتقاليد .. إنه اليوم اللي قبل العرس يكون سهرة للشباب .. وثاني يوم غدا وفاردة وكان الله بالسرّ عليم ..



والله دقيّت سلف وحكيت يا ولد روح قوم بالواجب .. هادول قرايبك وما قصّروا معك في المناسبات السعيدة والحزينة .. المهم وصلت على السهرة .. وهات يا مباوسة! طبعا كورس كامل .. بوسة على اليمين وسبعة على الشمال .. وهلا وهلا بنسيبنا نوّرت .. شو بدكوا بطولة أسيا للناشئين ..



المهم ..



كانت السهرة برعاية فرقة "إكس" للفنون الشعبية .. إكس وما ادراك ما إكس ..



إكس احترف الغناء منذ سنة تقريبا .. وذلك بعد ان جرّب حظه كحلاق .. ولكنه لم يفلح .. الحلاقة كانت توخذ معه ساعة! 10 دقايق حلاقة و50 دقيقة دندنة وطرب خلال الحلاقة .. كان الزبون تفقع مرارتوا وهو بيستنى .. وفي احدى المرات .. احد الزبائن "الله لا يوفقوا" لدّ على إكس وحكالوا: يا زلمة صوتك "مش بطّال"!



والله إكس ما حب يفشّل الزلمة .. راح جاب اورغ وشبّابة وواحد على الدي جيه وعمل فرقة ..

بس الفريد بإكس إنه ثري إن ون! يعني ماسك هال مايك الوايرليس ونازل يدبك ويرقص مع الشباب .. ونازل يحيّي عن جمب وطرف! واحلى ابو سمره واحلى ابو حميد واحلى ابو شداد واحلى وحدة اللي بالنصّ .. ما ترك حدا من شرّه .. والله العليم إنه كان سالخلوا قنينة سبيرتو مع حبتين صليبا .. عشان "ترندل" معه ..



وبينما إكس يشدو بأعذب الألحان .. والشباب تدبك الشمالية .. وإذ بإكس ينتقل نقلة نوعيّة من "سمرا وأنا الحاصودي" إلى "الشعب العربي وين" .. لخمني أقسم بالله! طبعا الشباب شاشت على سيرة الشعب العربي وين .. واللّويح كان ينطّ 2 متر عن الأرض على سيرة الحجار والاستعمار .. اشي بيفرح ..



وكلّه كوم .. والشبّابة مان كوم تاني! من أول ما جيت وهو ماسك هال شبابة ونازل يشبّب بين الحضور الكريم .. عامل جو مزبوط .. وما ضل حدا إلا راح عندوا وقعد يشببلوا .. وشوي ينط بين الدبيّكة .. بس أنا ما كنت فاهم كيف كان صوت الشبابة طالع مع المطرب "أسف على تسميته مطرب" .. حتّى لما إجى يشبّب عندي .. بطلع على الشبابة بلكي شابك فيها مايك زغير إشي .. ابدا!



شوي .. وحدثت الصدمة! الشبابة مان حاطط الشبابة بجيبتوا وقاعد بيدخن!! وصوت الشبابة ما زال مستمر مع الاغنية! يعني الزلمة طلع مجرد صطنط .. دمي فيرجن .. يعني بالعربي فاكتييس!! بالزبط زي لمّا تغني هيفاء وهبي بلاي باك بالحفلات .. عشان صوتها بيخزي وبلاش تنفضح على الملأ ..



سلخت كاسة الشاي .. ورنيّت على اهلي يطلعوا .. وقمت أخدت كورس المباوسة كمان مرّة .. على نيّة إني أجي تاني يوم على الغدا ..



ولنا هنا وقفة أخرى "بفتح الهمزة" إن ظلّينا عايشين ..



يتبع ..